By Cheryl A. Galili
SINISIGURO NG JCA Foundation ni Jose Pepito C. Alvarez na 100,000 pasyenteng salat sa kakayahang ipagamot ang kanilang mga sarili ang mabibiyayaan ng kanilang libreng medical, dental at iba pang serbisyo mula sa katimugang bahagi hanggang sa mga munisipyo sa hilagang bahagi ng lalawigan ng Palawan.
Sa naging panayam kay Alvarez noong ika-19 ng Marso sa medical mission na isinagawa ng JCA Foundation sa Aborlan, sinabi nito ang kanyang hangaring tumulong sa mga may problema, tulad ng sungi, may goiter, may sirang ngipin at iba pang serbisyong medikal.
Aniya, naaawa siyang may nakikitang sungi na mga kabataan at may mga goiter, lalo na ang mga kababaihan kung kaya nais niyang matulungan sila at malunasan ang kanilang karamdaman.
“Naawa talaga ako sa mga may goiter kaya kapag may nakikita ako maski wala pang schedule ng massive operation ng goiter dinadala na natin sa Puerto Princesa para masiguradong ma-ooperahan kapag dumating na ang scheduled day,” sabi ni Alvarez.
Sa kasalukuyan, umaabot na sa mahigit 22,000 pasyente sa Southern Palawan ang nabigyan ng libreng serbisyong medikal, dental at iba pa ng JCA Foundation mula sa mga munisipyo ng Brooke’s Point, Bataraza, Balabac, Sofronio Española, Rizal, Quezon, Narra at Aborlan.
Nagsimula ang mga libreng gawain noong ika-26 ng Enero hanggang ika-20 ng Marso sa taong kasalukuyan. Hanggang sa katapusan ng kasalukuyang buwan ay tutungo na ang JCA Foundation sa hilagang Palawan sa mga bayan ng Roxas at Dumaran.
Ayon kay Alvarez, pagkatapos ng misyon sa Dumaran at Roxas ay tinataya nilang nasa 30,000 residente na ng lalawigan ang nabigyan ng tulong upang mapangalagaan ang kanilang kalusugan.
“Hindi puwedeng balewalain ang kalusugan ng mga mamamayan. Kapag mayroong may sakit sa pamilya, lalo na kung iyon ay ang tatay at nanay, walang makatutulong sa mga anak na nag-aaral dahil walang maghahanap-buhay,” pahayag niya.
Idinagdag niya na ang tulong ng JCA Foundation ay dapat tapatan ng mga nagamot ng dobleng pag-iingat dahil mahirap magkasakit lalo na sa hirap ng buhay ngayon.
Sa serbisyong medikal pa lamang, sa bayan ng Bataraza ay nakagamot na ng 1,359; Balabac-1563; Brooke’s Point-2,323; Española-2,123; Rizal-2,258; Quezon-2,876; Narra-2,648 at Aborlan na may 2,450 na pasyente. Bukod pa dito ang bilang ng mga pasyente na pinagkalooban ng libreng serbisyong dental, pagtutuli at iba pa, gaya ng cleft operation.
Nakatakda namang magkaroon ng medical mission sa Dumaran sa darating na Marso 23-24; Marso 26 sa Tumarbong; Marso 27 sa Magara at Marso 28 sa Poblacion ng munisipyo ng Roxas. Magkakaroon naman ng libreng operasyon sa mga may cancer at ovarian cyst sa darating na Abril 15-18, 2009. Ang mga pasyente ay kinakailangan sumailalim sa screening ng mga municipal health center para sa madaling pag-proseso ng kanilang mga dokumentong kailangang isumite.
Kung sasakyan ang problema ng mga pasyente, may mga bus na susundo sa kanila para madala sa lungsod ng Puerto Princesa bago dumating ang araw ng kanilang operasyon. Wala silang gagastusin na kung ano pa man. Ibabalik sila sa kanilang mga lugar kapag gumaling na sila.
Dahil dito, pinuri ni Dr. Nickie F. Dagting ng Leyte ang dedikasyong ipinapakita ni Alvarez na makatulong sa mga kababayan nito sa Palawan. Sinabi niya na ito lamang ang milyonaryo na nakita niya na handang tumulong sa kanyang mga kababayan kaya’t saludo siya sa ginagawa nitong kawang-gawa.
“Ito lamang ang nakita kong milyonaryo na nagbibigay ng tulong sa kanyang kapwa, mayroon ding mga milyonaryo sa amin pero hindi katulad niya na handang tumulong sa kanila,” ayon pa kay Dagting.
Umaabot sa bilang na 31 na mga volunteer na doctor, nurse, dentist, pharmacist at staff na nagmula pa sa Davao, Cebu at Leyte ang kasama sa nasabing gawain. Kaagapay din nila ang mga barangay health worker (BHW) na galing sa mga rural health unit (RHU).
Samantala, ini-anunsyo rin ni Alvarez na bago matapos ang buwan ay ilulunsad na ang kanyang province-wide scholarship program para sa mga kabataang ibig mag-aral ngunit ang mga magulang ay walang sapat na kakayahan upang tustusan ang kanilang edukasyon.
Naniniwala si Alvarez na kapag ang mga kabataan ay nakapag-aral at nabigyan ng pagkakataong matuto upang harapin ang mga pagsubok para sa maganda nilang kinabukasan ay walang magdarahop.
“Ang edukasyon ang makatutulong sa bawat kabataan na makaahon sa kahirapan,” idinagdag pa ni Alvarez.
Kalusugan at edukasyon ang paniniwalaan niyang kailangan ng mamamayan at ng Palawan para sa patuloy nitong pag-unlad. Aniya, mababalewala ang lahat ng progresong tinatamasa ng probinsya kung ang mga mamamayan naman nito ay salat sa dalawang mahalagang bagay na ito.
